Govt Bungalow: కాంగ్రెస్ నాయకుడు రాహుల్ గాంధీ పార్లమెంటు సభ్యత్వాన్ని పునరుద్ధరించిన ఒక రోజు అనంతరం దేశ రాజధాని ఢిల్లీలోని 12 తుగ్లక్ లేన్‌లో ఉన్న తన పాత బంగ్లాను తిరిగి పొందారు. పార్లమెంట్ హౌసింగ్ కమిటీ నుంచి ఈ నిర్ణయం వెలువడిన వెంటనే.. మీడియా అడిగిన ప్రశ్నకు రాహుల్ స్పందిస్తూ ‘‘నా ఇల్లు యావత్ భారతదేశం మొత్తానిది’’ అని అన్నారు. పార్లమెంటు సభ్యత్వం కోల్పోవడంతో ఏప్రిల్ నెలలో తన అధికారిక బంగ్లాను రాహుల్ ఖాళీ చేశారు. బంగ్లా తాళాలను అధికారులకు అందజేసి సోనియా ఇంటికి మారిపోయారు. ఈ బంగ్లాలో రాహుల్ గత 19 సంవత్సరాలు ఉంటున్నారు.
ట్విట్టర్ ప్రొఫైల్ కూడా మారిపోయింది
పార్లమెంటు సభ్యత్వం పునరుద్ధరించగానే సోమవారం లోక్‌సభకు హాజరయ్యారు రాహుల్. ఇదిలా ఉండగా, తన ట్విట్టర్ ఖాతాలో తన ప్రొఫైల్‌ను కూడా మార్చారు. అనర్హమైన ఎంపీ (డిస్ క్వాలిఫైడ్ MP) అని ఉండే ట్విటర్ బయోను పార్లమెంటు సభ్యునిగా మార్చుకున్నారు. మోడీ ఇంటిపేరుపై రాహుల్ గాంధీ చేసిన వ్యాఖ్యలపై బీజేపీ నేత పరువు నష్టం కేసు వేయడంతో సూరత్ (గుజరాత్) కోర్టు రాహుల్ గాంధీకి రెండేళ్ల జైలు శిక్ష విధించింది. ఈ శిక్ష అనంతరం మే నెలలో రాహుల్ గాంధీ పార్లమెంటుకు అనర్హుడయ్యారు.
నిజానికి 2019లో సార్వత్రిక ఎన్నికలకు ముందు కర్ణాటకలోని కోలార్‌లో జరిగిన ర్యాలీలో రాహుల్ గాంధీ మాట్లాడుతూ ‘దొంగలందరి ఇంటిపేరు మోదీ అని ఎలా వస్తుంది?’ అని ప్రధాని నరేంద్ర మోదీని ఎగతాళి చేశారు. కాగా, ఈ కేసుపై గుజరాత్ కోర్టు విధించిన శిక్షపై తాజాగా సుప్రీంకోర్టు స్టే విధించింది. ‘రాహుల్ గాంధీ పిటిషన్‌పై విచారణ పూర్తయ్యే వరకు.. శిక్షపై స్టే విధించబడుతుంది’ అని కోర్టు పేర్కొంది. కొత్త విచారణ తేదీని ఇంకా చెప్పలేదు.
ట్రయల్ కోర్టు తీర్పుపై ఆశ్చర్యం వ్యక్తం చేసిన అత్యున్నత న్యాయస్థానం, “ట్రయల్ కోర్టు గరిష్ట శిక్ష ఎందుకు విధించిందో తెలుసుకోవాలనుకుంటున్నాం? జడ్జి ఈ విషయాన్ని తీర్పులో పేర్కొనాల్సింది. ఒకవేళ న్యాయమూర్తి 1 సంవత్సరం 11 నెలల గడువు ఇస్తే.. రాహుల్ గాంధీ అనర్హులు కాలేరు. గరిష్ఠ శిక్ష కారణంగా, ఒక లోక్‌సభ స్థానం ఎంపీ లేకుండానే మిగిలిపోతుంది. ఇది కేవలం ఒక వ్యక్తి హక్కులకు సంబంధించిన విషయం కాదు, ఆ సీటు ఓటర్ల హక్కులకు సంబంధించిన అంశం కూడా’’ అని కోర్టు పేర్కొంది.
అయితే, సుప్రీంకోర్టు తన నిర్ణయంలో రాహుల్ గాంధీని కూడా హెచ్చరించింది. ప్రసంగంలో రాహుల్ చేసిన వ్యాఖ్యలో తమకు సైతం అభ్యంతరం ఉందని పేర్కొంది. నేతలు బహిరంగంగా మాట్లాడేటప్పుడు జాగ్రత్తగా ఉండాలని సూచించింది. ఇలా అలవాటైతే అది కర్తవ్యంగా మారుతుందని రాహుల్‌గాంధీకి కోర్టు పేర్కొంది.
